Nieuwjaar - Wolmer 58

Hier een inzending van een abonnee van De Schoolkrant uit 1960:

Zo! We binnen de drumpel 59-60 weer met veul geknap en 't luden van de kerkklok overgoan. De eerste dag van 't joar is veur 'n hele bult een drokke dag, mor aal met aal van die gebeurtenissen, as ze d'r niet meer wazzen, hadden we weer een traditie minder. En die mouten we zoveul meugelijk in eren hollen.

As we dan zo is de balans opmoaken van wat ons in 1959 veur belangrieke gebeurtenissen passerd binnen, dan is de restauratie van de meul wel punt ein. Doar is ons dorp wel met in 't middelpunt van de belangstelling te stoan kommen. Wat was dat ok een drokte! En wat 'n feestelijk anzicht met aal die vlaggen. En d'r was een kerel van de film, de radio en van wel 'n stuk of wat kranten. 's Oavends wór elk en ein in de gelegenheid steld om alles te heuren, wat er doags deur de sprekers zegd was.

Nou, en dat was een heil inne. En dan is de film van Rowol weer draaid. 't Was nou niet allein een lust om er noar te kieken, mor ok om er noar te lusteren.

Doar is e 'n bult mooier van worden. 'k Heb 's nachts dreumd, dat ze een echte speulfilm muiken in Rowol, net as Fanfare in Giethoorn. Luut Veldhoes haar de hoofdrol. Ze wazzen drok an 't opnoamen moaken in de meul. Komp mai doar zo'n filmkerel van de winterlaszoller ofvallen, mai boven op de kop, woar ik wakker van wör en tot de ontdekking kwam, da'k op berre laag.

En toen met 'n poar E.S.A.bussen noar de Corso om de meul te bewonderen. Nou, hij stun er meroakel mooi op. Ep en Frederik wazzen de veurnoamste sterren op 't douk. Catharina Valente was van heil aner doun. Die wichter hadden heur wel redden kund met 'n koukzak van 't veurslag om heur te kleiden. Stof was wat dunner. Nee, meisten hadden niet veul. En 'n heil bult vonden er ok niet veul an. "t Was aans wel goud organizeerd.

Mor aal met aal, ons meul staait er weer, as een keunink kiekend over Rowol, stilzwiegend het gedou onner hom goadesloagend. En loaten we hom touwinsen, dat Frederik nog voak de vang lichten maag om alle kamroaden en stampers oet heur sloap wakker te schudden, opdat aal het olle en mooie niet verloren gaait, zoas börgemeester zee. En dat e 'n bult bezuik kriegen maag, want hij is 't ankieken ten volle weerd!

Abonnee